Հաշվի առնելով տնտեսության զարգացման վերջին միտումները «Յունիբանկ»-ը մշակել է ՓՄՁ-երի աջակցման նոր ծրագիր, որի մեկնարկը արդեն տրված է: Ծրագրի շրջանակներում ՓՄՁ-երին բանկը տրամադրում է մինչեւ 30 ամիս մարման ժամկետով եւ առավելագույնը 30 հազար ԱՄՆ դոլար գումարի վարկեր, որոնց տարեկան տոկոսադրույքը սահմանված է 22-24%:  
Հիմնադրվելուց ի վեր փորք եւ միջին ձեռնարկատիրության վարկավորումը «Յունիբանկ»-ի համար  հանդիսացել է գործունեության գերակա ուղղություններից մեկը: Ինչպես նշեց բանկի Վարչության նախագահի տեղակալ Արա Ավագյանը, այս ոլորտի զարգացման համար բանկային վարկը չափազանց կարեւոր դեր ունի: «Վերջերս կատարված ուսումնասիրությունները վկայում են, որ շրջանառու միջոցների համալրման նպատակով միջոցների կարիք ունեցող ձեռնարկություների քանակը բավականին մեծ է: Անհրաժեշտ վարկային միջոցների ստացումը հնարավորություն կտա նրանց ապահովել հետագա  անխափան գործունեությունը»,- ասում է Ա. Ավագյանը:  
Նշվեց նաեւ, որ այս տարվա փետրվարի վերջին «Յունիբանկ»-ի ընդհանուր վարկային ներդրումները կազմել են ավելի քան 44 մլրդ 246 մլն դրամ` նախորդ տարվա նույն ժամանակահատվածի համեմատ աճելով գրեթե 45%-ով: