Յունիբանկը ներկրմամբ և արտահանմամբ զբաղվող ընկերություններին և անհատ ձեռներեցներին շահավետ պայմաններով առաջարկում է հատուկ այս ոլորտի համար մշակված վարկատեսակ` «Ներմուծում/Արտահանում»: Վարկի գումարը կազմում է մինչև 500 000 ԱՄՆ դոլար կամ եվրո, տոկոսադրույքը` սկսած 9% տարեկան: Վարկը նախատեսված է բացասական վարկային պատմություն չունեցող անհատ ձեռներեցների կամ իրավաբանական անձանց համար, որոնց բիզնեսի գործունեության ժամկետը կազմում է առնվազն 12 ամիս: Որպես գրավի առարկա կարող է հանդես գալ անշարժ կամ շարժական գույքը:

Հաշվի առնելով ներմուծման և արտահանման ոլորտի առանձնահատկությունները, Յունիբանկը հաճախորդներին առաջարկում է վարկի մարման ճկուն և անհատական ժամանակացույց: Վարկի վաղաժամկետ մարումը թույլատրվում է առանց որևէ սահմանափակումների:

«Շուկայի ուսումնասիրության արդյունքում, մենք որոշեցինք ներմուծմամբ և արտահանմամբ զբաղվող ձեռնարկությունների համար մշակել հատուկ վարկ, որն իր պայմաններով լավագույնս կբավարարի ֆինանսական միջոցների նկատմամբ ձեռնարկությունների պահանջարկը: Մատչելի վարկային միջոցները և մարման ճկուն ժամանակացույցը հնարավորություն կտան ձեռնարկություններին խթանել իրենց գործունեությունը և բարձրացնել մրցունակությունը: Վարկի ստացման գործընթացը հնարավորինս պարզեցնելու համար հաճախորդը ներկայացնում է փաստաթղթերի նվազագույն փաթեթ և կարճ ժամանակահատվածում արդեն իսկ ստանում վարկային միջոցները», - նշեց «Յունիբանկի» Վարչության նախագահի տեղակալ, կորպորատիվ բիզնեսի զարգացման և վաճառքների տնօրեն Դավիթ Պետրոսյանը: