Մինչեւ տարեվերջ «Յունիբանկ»-ը կբացի տաս նոր մասնաճյուղ

11.06.2009 Առաջինը`  «Զվարթնոց» օդանավակայանում
Հաշվի առնելով  գործունեության ծավալների եւ հաճախորդների թվաքանակի աճը, «Յունիբանկ»-ը մինչեւ տարեվերջ կբացի տաս նոր մասնաճյուղ: Աշխատանքների մեկնարկն արդեն տրված է: Ինչպես նշեց «Յունիբանկ»-ի Վարչության նախագահ Վարդան Աթայանը, նոր մասնաճյուղերի տեղաբաշխման ընտրությունը կատարվել է ելնելով տվյալ բնակավայրում բանկային այս կամ այն ծառայության նկատմամբ առկա  պահանջարկից: Այսպես, մոտ օրերս «Զվարթնոց» օդանավակայանի ժամանման սրահում կբացվի բանկի նոր մասնաճյուղ` կահավորված կորպորատիվ ոճով: Նորաբաց մասնաճյուղը կաշխատի  24-ժամյա ռեժիմով, առանց հանգստյան օրերի:  
«Օդանավակայանում մասնաճյուղ բացելու գաղափարի հիմնական նպատակը արտերկրից Հայաստան ժամանողների սպասարկման հարմարավետության ապահովումն է: Այս մասնաճյուղի հիմնական գործառույթը լինելու է «Յունիստրիմ» դրամական փոխանցումների համակարգի սպասարկումը, այսինքն անձը  իրեն անհրաժեշտ գումարը մեկնելուց առաջ կարող է փոխանցել այս համակարգով եւ ժամանելուն պես այն ստանալ, անկախ նրանից աշխատանքային թե հանգստյան օր է եւ ժամը քանիսն է:  Մյուս կարեւոր գործոնը,  դա արժույթի փոխանակման կետի առկայությունն է, որում փոխարժեքները սահմանվելու են «Յունիբանկ»-ի երեւանյան այլ մասնաճյուղերին համապատասխան»,-ասում է Վարդան Աթայանը:  
Բացի «Զվարթնոց» մասնաճյուղից, նոր մասնաճյուղեր, մասնավորապես, կբացվեն նաեւ Երեւանի Զեյթուն, Դավիթաշեն, Աջափնյակ, Էրեբունի եւ Ավան թաղամասերում, ինչպես նաեւ Արարատ եւ Տաշիր քաղաքներում
Ներկայումս «Յունիբանկ»-ի մասնաճյուղային ցանցն ընդգրկում է 30 մասնաճյուղեր, որոնցից երկուսը` ԼՂՀ-ում: Մոսկվայում գործում է նաեւ բանկի ներկայացուցչությունը: