Մանրածախ բանկային բիզնեսի արագ զարգացումը, որը «Յունիբանկ»-ը հռչակել է իր գերակա ուղղությունը, նախատեսում է ընդլայնված մասնաճյուղային ցանցի առկայություն եւ բանկային ծառայությունների տարածքային մոտեցում հաճախորդներին` ինչպես մայրաքաղաքում, այնպես էլ մարզերում: Հաշվի առնելով վաճառքի ծավալը եւ հաճախորդների թվի նշանակալի աճը, 2011թ.-ին բանկը կբացի 8 նոր մասնաճյուղ, հասցնելով դրանց քանակը 42-ի: Մասնավորապես, մինչեւ ընթացիկ տարվա հունիս ամիսը մասնաճյուղեր կբացվեն մայրաքաղաքի Դավիթաշեն, Էրեբունի եւ Արաբկիր համայնքներում, ինչպես նաեւ Տաշիր քաղաքում:  Երեք նոր մասնաճյուղ նախատեսվում է բացել նաեւ Երեւանի կենտրոնում: Նոր մասնաճյուղերը կտրամադրեն բանկային բոլոր ծառայությունները. ավանդների ընդունում, վարկավորում, բանկային քարտերի տրամադրում եւ սպասարկում, Յունիստրիմ դրամական փոխանցումների իրականացում, վճարահաշվարկային ծառայությունների մատուցում, կոմունալ վճարումների ընդունում եւ այլն:

Ներկա դրությամբ «Յունիբանկ»-ի մասնաճյուղային ցանցն ընդգրկում է    34 մասնաճյուղ, որոնցից երեքը` «Ամիրյան», «Կոմիտաս» եւ «Մալաթիա» մասնաճյուղերը հաճախորդներին սպասարկում են երկարացված ռեժիմում` մինչեւ 19:30-ը: «Զվարթնոց» մասնաճյուղն աշխատում է շուրջօրյա, առանց հանգստյան օրերի: Բանկի բոլոր մասնաճյուղերը միացված են տվյալների համընդհանուր բազային եւ աշխատում են online աշխատակարգով, ինչը հաճախորդների համար ապահովում է ծառայություններից օգտվելու առավելագույն հարմարավետություն:

Միաժամանակ, մասնաճյուղային ցանցի ընդլայնմանը զուգընթաց, «Յունիբանկ»-ը շարունակում է իրականացնել մասնաճյուղերի վերազինման գործընթացը: Այս տարի Գյումրի մասնաճյուղը կտեղափոխվի նոր, երկհարկանի շենք: Եվս երեք մարզային մասնաճյուղեր` «Եղեգնաձոր», «Ալավերդի» եւ «Աշտարակ», կվերակառուցվեն բանկի միասնական   կորպորատիվ ոճով, որը ավելի հարմարավետ կդարձնի հաճախորդների սպասարկման գործընթացը: