2014թ.-ի փետրվարի 27-ին Ռուսաստանում կայացած “Տարվա բանկ” ամենամյա մրցանակաբաշխությանը, որն անցկացվում է Banki.ru պորտալի կողմից, Յունիբանկի Խորհրդի նախագահ և ռուսաստանյան Յունիաստրում բանկի նախագահ Գագիկ Զաքարյանը բանկային բիզնեսում ներդրած ավանդի համար ճանաչվել է “Տարվա բանկիր - 2013”: Մրցանակը հանձնել է Banki.ru պորտալի գործադիր տնօրեն Ելենա Իշչեևան:

"Ինձ համար շատ հաճելի է, չէի սպասում: Մեզ համար դա մեծ պատիվ է: Ինչպես միշտ, մենք փորձում ենք օգտակար լինել բոլորին` հաճախորդներին և հասարակությանը", - ասել է Գագիկ Զաքարյանը` ընդունելով մրցանակը:

Ելենա Իշչեևան նշել է, որ չնայած անցած տարի Կիպրոսում ծագած ֆինանսական խնդիրներին, "Յունիաստրում բանկի" հիմնական բաժնետեր` Bank of Cyprus-ին (80% մասնաբաժին), հաջողվել է ոչ միայն պահպանել իր բարի համբավը, այլ նաև ամրապնդել դիրքերը ռուսաստանյան շուկայում` ռուսաստանյան սեփականատերերի ակտիվ գործունեության և տեղեկատվական բաց քաղաքականության շնորհիվ:

Գագիկ Զաքարյանը տարբեր տարիներին արժանացել է ֆինանսական աշխարհի մի շարք առաջատար մրցանակների, այդ թվում` “Լավագույն բանկիր” տիտղոսին 2005 և 2007թթ.-ին: 2006թ.-ին “Բիզնեսի սոցիալական պատասխանատվություն” անվանակարգում ճանաչվել է “Տարվա մարդ”, իսկ 2007թ.-ին դարձել ՌԴ Ազգային բանկային մրցանակաբաշխության մրցանակակիր բանկի արդյունավետ կառավարման համար: 2013թ.-ին Գագիկ Զաքարյանը պարգևատրվել է Հայ եկեղեցու բարձրագույն` «Սուրբ Գրիգոր Լուսավորիչ» շքանշանով` ի գնահատություն ազգօգուտ և եկեղեցաշեն գործունեության: