Հաճախորդների սպասարկման բարելավման և մասնաճյուղերի աշխատանքի օպտիմալացման նպատակով, Յունիբանկն անցում կկատարի “մեկ պատուհանի” սկզբունքով աշխատանքի:

Նման որոշման շնորհիվ, ավանդի, վարկի, բանկային քարտի ձևակերպումը, դրամական փոխանցման իրականացումը կամ կոմունալ վճարումը կարելի է կատարել` դիմելով բանկի ընդամենը մեկ աշխատակցի: Դրամարկղի կամ սպասարկող այլ մենեջերին լրացուցիչ մոտենալու կարիք այլևս չկա:

Արդեն իսկ Յունիբանկի երկու` “Օպերա” և “Աճառյան” մասնաճյուղերը հաճախորդների սպասարկման գործընթացն իրականացնում են “մեկ պատուհանի” սկզբունքով: Արդյունքում մի քանի անգամ մեծացել է հաճախորդների սպասարկման արագությունը և բարձրացել մասնաճյուղերի աշխատանքի արդյունավետությունը: Մինչև այս տարեվերջ բանկի բոլոր 46 մասնաճյուղերը փուլ առ փուլ կանցնեն հաճախորդների սպասարկման նոր ձևաչափին:

“Մեր հաճախորդներն արդեն հնարավորություն ունեցել են գնահատելու “մեկ պատուհանի” սկզբունքով սպասարկվելու առավելությունը երկու մասնաճյուղերում: Այդ կերպ մենք ապահովում ենք աշխատանքի արագությունը և խնայում մեր հաճախորդների ժամանակը, - ասում է Յունիբանկի Վարչության նախագահ Վարդան Աթայանը: - Հաճախորդների թվաքանակի ավելացումն ու բիզնեսի ծավալների աճը ենթադրում են նոր մասնաճյուղերի բացում ու սպասարկման գործընթացի շարունակական բարելավում: Սպասարկման արագությունն ու հարմարավետությունը մեր հաճախորդների պահանջն է և մենք պատրաստակամ ենք այն բավարարելու”:

Ներկայումս Յունիբանկն ունի 46 մասնաճյուղ և ներկայացուցչություն Մոսկվայում: Բանկը սպասարկում է ավելի քան 220 հազար հաճախորդի: