Հայաստանի բանկային համակարգի պատմության մեջ առաջին անգամ Յունիբանկը կգործարկի mobile commerce (առևտուր բջջային հեռախոսի միջոցով) ծառայությունը:  2012թ.-ի հունվարին նախագիծը կենթարկվի անհրաժեշտ թեստավորման, որից հետո   mobile commerce ծառայությունը հասանելի կդառնա հաճախորդների համար:  
  
Mobile commerce ծառայության հիմնական նշանակությունը մանրածախ ծառայությունների և ապրանքների դիմաց վճարումների իրականացումն է հեռախոսի միջոցով: Այն հնարավորություն է տալիս հաճախորդներին կառավարել իրենց բանկային հաշիվները, կատարել դրամական փոխանցումներ, գնումներ, վճարումներ կոմունալ ծառայությունների դիմաց, քարտից քարտ փոխանցումներ և այլն:

Ծառայությունից օգտվելու համար Յունիբանկի հաճախորդների բջջային հեռախոսներում կտեղադրվի հատուկ ծրագիր, որը կապահովի անկանխիկ և անվտանգ գործարքների իրականացումը: “Նման նախագծերը հաջողությամբ իրագործվել են աշխարհի տարբեր երկրներում, այդ թվում` Ռուսաստանում: Այնպես որ, մենք ակնկալում ենք ոչ պակաս պահանջարկ նաև Հայաստանում: Յունիբանկը մանրածախ բանկային շուկայի ամենաակտիվ մասնակիցներից մեկն է և մենք մշտապես ձգտում ենք հաճախորդին առաջարկել առավելագույնս հասանելի և հարմար ժամանակակից ծառայություններ”, - ասում է Յունիբանկի Վարչության նախագահի տեղակալ, Քարտային բիզնեսի ուղեկցման  գծով տնօրեն Մեսրոպ Հակոբյանը: